Jokin Altunak Lau eta Erdiko Txapelketako bigarren finalerdia jokatuko du igandean, Eibarren (Gipuzkoa), Erik Jakaren aurka. Amezketako (Gipuzkoa) aurrelariak azken proba egin du gaur goizean herriko pilotalekuan, ezker sorbaldan duen minak behar bezala jokatzen uzten dion edo ez erabakitzeko. Lehenbizi, Jon Erasun pilotari profesional ohiarekin aritu da beroketa lanak egiten, eta, ondoren, 45 minutu pasatxoan aritu da Jokin Etxaniz Aspeko zuzendari teknikoarekin. Proba balekoa izan da, eta amaitutakoan erabaki du jokatu egingo duela. «Min gutxixeago dut, eta, partidak duen garrantzia kontuan hartuta, kantxara irtetea erabaki dut. Daukadan guztia emango dut».
Jaka eta Altuna III.a igandean ariko dira. Larunbatean, berriz, Jon Ander Peñak eta Peio Etxeberriak jokatuko dute lehen finalerdia, Gasteizko Ogeta frontoian (17:00, ETB1). Biek lehen aldiz aritu nahi dute finalean: Peña II.a lehen aldiz ariko da finalerdietan; Peio Etxeberria, berriz, hirugarrenez jarraian. Aurrelari oldarkorrak dira biak, eta, horren ondorioz, nahi baino huts gehiago egiten dituzte. Gutxien egiten dituenak irabaziko du.