Jokin Altunak eta Joseba Ezkurdiak zintzo onartu dute euren helburuetan ez zela sartzen buruz burukoaren finalerdietan sartzea. Igandeko partidarako pilota aukeraketan onartu dute biek, Bilboko pilotalekuan, eta horregatik bat egin dute presiorik sentitzen ez dutela esatean. Apustuak parean irtengo dira, ez dago faborito garbirik, hala ere Altuna ez da iritzi bereko. «Niretzat Joseba da faboritoa, eskarmentu gehiago du, eta adin hobea. Nire ustez pilotariek hobetu jokatzen dute 28 urterekin 22rekin baino».
Pilotekin ez da arazorik egon. Joseba Ezkurdiak denbora guztia agortu du, baina esan duenez ez du arazorik izan. «Pilota indartsuak» aukeratu ditu, luze jokatzekoak. Jokin Altunak ere gustuko pilotak aurkitu ditu, baina beldur zen aurkariak aukeratuko zituenarekin —berak aukeratu du lehenbizi—. «Hasieran, saskian, bi pilota oso bizi zeuden, baina Ezkurdiak baztertu egin ditu. Horrek lasaitu egin nau».
Partida igandean jokatuko da, eta sarrera asko gelditzen dira salgai. Zaila da Bilboko pilotalekuak dituen 3.000 eserlekuak betetzea. Irabazleak buruz buruko lehen finala izango du, eta Danel Elezkanok eta Aimar Olaizolak larunbatean jokatuko dute partidako irabazlea izango du aurkari
