Esprinter onenen pare aritu da Simon Gerrans (Greenedge) Frantziako Tourreko hirugarren etapan, Ajaccio eta Calvi artean. Eguneroko legean, berehala sortu da ihesaldia, bost lagunekoa: Cyril Gautier (Europcar), Alexis Vuillermoz (Sojasun), Simon Clarke (Orica), Lieuwe Westra (Vacansoleil) eta Sebastien Minard (Ag2r). Lau minututik gorako aldea ere izan dute, baina Marsolino bigarren mailako mendate motz baina gogorrak txikitu du tropela, helmugara iristeko 13,5 kilometro falta zirela.
Ihesaldia ezerezean geratuta zegoela, helmugara iristeko hamasei kilometro falta zirela jo du erasoa Igor Antonek (Euskaltel), lehen malda gogorretan, eta atzetik iritsi dira Pierre Rolland (Europcar), Mikel Nieve (Euskaltel), Lars Peter Nordhaug (Belkin) eta Sylvain Chavanelen (Omega) erasoak. Laukotea sortu dute aurrean, eta hamar bat segundoko aldea ere izan dute. Baina ordurako esprinter nagusiak atzean geratuta zeudela, Oricak hartu du ardura tropelean. Hiru kilometro falta zirela bat egin dute denek aurrean, eta Gerransek ozta-ozta hartu dio aurrea Peter Sagani (Cannondale); bigarren egunez jarraian, bigarren izan da eslovakiarra. Jose Joaquin Rojas (Movistar) helmugaratu da hirugarren postuan. Jan Bakelantsek (RadioShack) eroso samar eutsi dio lidergoari. Behin etapa amaituta, Nizarako bidea hartuko du tropelak, 25 kilometroko taldekako erlojupekoa jokatuko delako bihar bertan. Etapa serioa da biharkoa Tourra irabazteko faboritoentzat.
