Amaitu da pausaldia

Eten luzea izan dute Top 14ko jokalariek, azaro osoan nazioarteko selekzioei lekua uzteko klubek ez baitute partidarik jokatu. Azken partida, Top 14ko hamabigarren jardunaldia, azaroaren 4an jokatu zuten baionarrek eta miarriztarrek, eta hilabeteko atsedenaren ondotik berriz jokatzeko irrikan daude bi taldeak.

Baiona hasiko da bi taldeetan lehenik jardunaldi honetan. Arroxela, Bigarren Mailatik igo berri den taldea jasoko du etxean, Jean Dauger zelaian 14:30ean. Atlantiar ozeanoko jokalariak sasoi ona egiten ari dira, eta 11. postuan daude lau garaipen eta zortzi porrotekin. Hori-beltzak itxura ona ematen ari dira, eta Racing edo Perpinya bezalako zelai bihurrietan gutxigatik galdu dute.

Baionarrek, beraz, serio jokatu beharko dute, dagoeneko hiru aldiz galdu dutelako etxean sasoi honetan. Hori bai, etxetik kanpo beste hirutan irabazi dute, eta horrenbestez balantze orekatua dute sailkapenean, sei garaipen eta sei porrotekin.

Astea mugitua izan da Baiona aldean, astelehen honetan jakitera eman baitu Francis Salagoiti presidenteak Bernard Laporte taldeko administraria bilakatuko dela. Stade Français eta Frantziako selekzioa urte luzetan zuzentzen aritu dena polemika hurbil izaten duen horietakoa da. Nicolas Sarkozyren gobernuan egon da, 2007tik 2009ra Kirol ministro bezala. Negozio gizona ere bada Laporte, eta besteak beste, bi kasino, bixkotxa lantegi bat eta hiru jatetxe ditu. Bere izena, hainbat polemikatan nahastua egon da, eta epaileekin gorabeherak izan ditu, zergekin zerikusia duten auziengatik batik bat.

Bestalde, azken uneko berritasuna izan da Miarritzerentzat. Berez, gaur jokatu behar zuen Bourgoinen partida. Baina Frantzian izandako elurteak zelaia oso baldintza txarretan utzi du. Ondorioz, partida bihar jokatuko da, 15:00etan, eta Bourgoinen izan beharrean, Miarritzeko Agileran jokatuko da. Lapurdiko taldearen jarraitzaileek azken unean partida ikusteko parada izanen dute, estadioan berean salgai egonen baitira sarrerak. Miarritze laugarren da sailkapenean, eta Bourgoin azkena.