Fernando Amorebietak Fulham Ingalaterrako taldean jokatuko du datozen lau denboraldietan. Athleticeko erdiko atzelariari sasoi honen amaieran amaitzen zaio kontratua, eta klubarekin izan dituen negoziaketetan ez du akordioa lortu hitzarmen hori luzatzeko. Klubak eskaintza egin zion, baina jokalariak ez zuen erantzun, eta azkenean eskaintza kentzea erabaki zuen Athleticek.
Amorebietak 28 urte ditu, eta zortzi sasoi daramatza lehen taldean jokatzen. Guztira 254 partida jokatu ditu, eta lau gol sartu. Zortzi partida jokatu ditu Venezuelako selekzioarekin, eta lau Euskal Selekzioarekin.
