Anaitasuna ezinean aritu da Torrevellaren aurka, eta 24-13 galdu du

Ahazteko moduko partida jokatu zuen Anaitasunak atzo, Torrevellaren aurka. 24-13 galdu zuen. Aitor Etxaburuk entrenatzen dituen jokalarientzat harresiaren modukoa izan zen etxekoen defentsa, eta ez ziren pareta zulatzeko gai izan. Ezinean aritu ziren, behin eta berriz, eta ezintasun horrek jokoan eta markagailuan izan zuen isla zuzena.

Hasieratik jarri zen partida Torrevellaren alde. Inolako aukerarik ez zuen izan Anaitasunak bere jokoa egin, eta aurkaria ezustean harrapatzeko. Joko eskasa erakutsi zuten nafarrek. Eta Anaitasuna ez zen hutsak zuzentzeko gai izan bigarren zatian. Markagailuari buelta emateko inolako aukerarik ez zuen izan. Ezinean aritu zen, partidaren amaierara arte. Porrota lehenbailehen ahazten saiatu beharko dute Etxabururen jokalariek.

Amaya Sport San Antoniok, bertzalde, Cuencaren aurka jokatuko du gaur, haren pistan (20:15). Nafarren entrenatzaile Juanto Apezetxeak argi utzi du zaila izanen dela aurkaria ezustean harrapatzea, baina horretan ahaleginduko da taldea. Lehen itzulian 29-24 irabazi zuten iruindarrek. Geroztik Francisco Javier Zupo Ekisoainek zuzentzen duen taldearen jokoak gora egin duela erran du Apezetxeak, eta zaleen laguntzarekin aurkari arriskutsua izan daitekeela azpimarratu du.

Gaurko partidarako San Antonioko jokalari guztiak izanen dira jokatzeko prest, ziurrenik. Denak ez dira sasoi betean, eta zalantzazkoa da azkenean pistara ateratzeko moduan izanen ote diren Niko Mindegia, Alberto Agirrezabalaga eta Luisfe Jimenez, arazo fisikoak izan baitituzte.

Bera Bera 31-24 garaile

ABF ligari dagokionez, Bera Bera erraz nagusitu zen atzo bere pistan, Leonen aurka. 31-24 irabazi zuten donostiarrek, lehen zatian sufritu arren. Jokoaren ardura bere esku hartu zuen etxeko taldeak, eta egindako lanak jaso zuen saririk.

Kukullagak, berriz, 24-30 galdu zuen Elxen aurka. Puntu premia larria dute bizkaitarrek.