Anaitasunak atezainen aurka egin du talka

Anaitasunak partida garrantzitsua galdu zuen atzo Logroñon, Naturhousen aurka (28-20). Iruñeko taldea kamuts aritu zen erasoan, eta etxekoen atezainek erakustaldia eman zuten. Naturhousen defentsak lan ona egin zuen, eta ate zaindariek jaurtiketa behartuak ondo baliatu zituzten. Anaitasunaren ligako partidarik txarrena izan zen, Bartzelonaren aurkako porrot logikoa kenduta, eta, ondorioz, jaisteko postuetara hurbildu da. Orain 14. da Asobal ligako sailkapenean.

Anaitasunak gorriak ikusi zituen Logroñon golak sartzeko. Erasoan ezinean aritu zen, eta larrutik ordaindu zuen. Bederatzi baino ez zituen sartu lehen zatian (13-9), eta bigarrenean ez zen askoz finago ibili. Ezinaren zergatia estatistikan aurki daiteke. Etxekoen atezainen geldiketetan, esaterako, Aginagalderi hogeita bost jaurtiketa egin zizkioten eta hamabi gelditu zituen; Martinezek, berriz, hamahirutik sei. Bien artean %48 gelditu zuten, erdia.Anaitasunakoek, berriz, %32 gelditu zituzten. Adierazgarria da Anaitasunak ez zuela kontraeraso bakar bat ere egin.

Bigarren zatian partida ez zen aldatu, eta Naturhousek aldea handitu zuen. Bukatzeko hamar minutu falta zirela, Anaitasunak 4-0 partziala jaso zuen, 20-16tik 24-16ra, eta partida erabaki zen. Iruñekoen aldetik Ragot izan zen golegilerik onena; hegalekoak bost gol sartu zituen.

Bera Berak irabazi egin du

Bera Berak hortzak estutu behar izan zituen atzo Mar Alacanten aurkako ABF ligako partida irabazteko (24-22). Kanpokoek hobeto jokatu zuten lehen zatian, eta aurretik iritsi ziren atsedenaldira (11-13). Bera Berak itogina zuen atzean, eta Reyes Karrerek hori konpontzeko agindu zien jokalariei. Entzun eta egin, aurkariek bederatzi gol baino ez zituzten sartu bigarren zatian, eta etxekoak apurka partida kontrolpean hartuz joan ziren. Kukullagak, berriz, 17-22 galdu zuen Porriñoren aurka etxean. Etxebarriko taldeak lau partidak galdu ditu, eta sailkapeneko zuloan dago.