Anaitasunak etxetik kanpoko lehen partida irabazi du Octavioren aurka

Anaitasunako jokalariek gozo lo hartuta egin zuten bart Vigo (Galizia) eta Iruñea arteko hamar orduko autobus bidaia. Irabazi ondoren errepidea beti da leunagoa, eta Octavioren aurka 28-38 nagusitu ondoren sailkapeneko zulotik pixka bat aldendu dira —11., postuan daude orain—. Irabazi, eta nola gainera, Aitor Etxaburuk zuzentzen dituen jokalariek maila bikaina eman zutelako, erasoan bereziki, eta bide batez denboraldiko etxetik kanpoko lehen garaipen lortu zuten.

Anaitasunak hobeto ekin zion partidari, eta lehen ordu laurdenean bost goleko errenta lortu zuen (6-11). Etxekoen defentsa nahierara zulatu eta sei metroetatik jaurtiki zuen gehienetan. Hasiera ikusgarriaren ondoren pilaturiko altxorra babestea zen helburua, eta nafarrek ez zioten Octaviori gerturatzen utzi atsedenaldiaren aurretik (14-19).

Lehen zatian egin bezala, Anaitasunak hobeto hasi zuen bigarren zatia eta 7-2ko partzial batekin etxekoen susperraldi itxaropenak zapuztu zituen (16-26, 36. min). Azken hogeita bost minutuetan errenta kudeatu zuen, batez ere erasoan ez zuelako huts egin. Anaitasunako goleatzaile nagusiak Reig, 10 golekin, eta Fuentes, 7, izan ziren.

Itxako-Zuazo derbia

ABF ligako lau euskal taldeek gaur jokatuko dituzte zazpigarren jardunaldiko partidak. Erakargarriena Lizarreria pabilioian izango da (18:30), Itxakok eta Zuazok derbia jokatuko baitute. Bi taldeak kinka larrian daude, eta irabazleak arnasa hartuko du. Itxako sailkapeneko zuloan dago eta Barakaldoko taldeak puntu bat gehiago baino ez du.

Bera Berak ere partida garrantzitsua du, etxean (18:30, ETB1), Valentzia seigarren sailkatuaren aurka. Donostiako taldearen liga hasiera ez da ona izaten ari, eta egun laugarren postuan daude. Beraz, garaipena beharrezkoa da tituluaren borrokan atzera pauso gehiago ez emateko. Azkenik, Kukulagak Elx hartuko du Etxebarriko kiroldegian (20:00).Bizkaitarrak zazpigarren dira sailkapenean, aurkariak, berriz, bigarren.