Andres Nocioni Caja Laboralera itzuliko da, eta sasoia bukatu arte jokatuko du

Andres Nocioni Chapu-k Caja Laboral Baskoniarekin jokatuko du denboraldia bukatu arte. Taldeko izar, zaleen kutun eta 2003-04ko ACBko jokalari onena izandakoa Gasteizera itzuliko da 32 urterekin. NBAko Philadelphia Sixersekin zuen kontratua eten berri du, eta taldeak bihar aurkeztuko du jokalari berria. Nocionik sasoiko egon nahi du Londresko Olinpiar Jokoetan Argentinako selekzioarekin aritzeko, eta Baskoniaren eskaintza lehenetsi du.

Hegalekoak (2,03 m eta 102 kilo) aurreko astean eten zuen NBAn izan duen azken taldearekin zuen kontratua, entrenatzailearen konfiantzarik gabe ernegatuta zegoelako. Chicagok fitxatuko zuela zabaldu zen lehenbizi, bertan lau sasoi bikain egin zituelako. Baina, akordiorik lortu ez zutenez, Europara itzuliko zen zurrumurruak indar hartu zuen. Behin Ozeano Atlantikoa gurutzatuta, helmuga Gasteiz izan zitekeen, are gehiago Dusko Ivanovic bertan egonda, hegalekoa hobekien gidatu duen teknikaria. Bada, albistea atzo eman zuen taldeak, eta bide batez zaleek aspaldiko oparirik gozoena jaso zuten.

Nocionirekin idolo bat itzuliko da Buesa Arenara, Baskoniaren aro onenaren ikur. Hiru denboraldi egin zituen bakarrik taldean (2001-2004), bainajokalari gutxik bezalako arrastoa utzi zuen Chapuk. Hiru sasoi horietan liga bat(2002) eta bi kopa irabazi zituen, eta Baskoniak jokaturiko 132 partidetan 13,4 puntu eta sei errebote lortu zituen batez beste. Nocioniren eragina, baina, estatistikez harago doa, izaera lehiakorreko jokalari borrokalaria baita. Ilusioa jarraitzaile kopetilunei itzultzeko jokalari aproposa.

Liga bukatzear ari dela, baliteke Baskoniak fitxatzen duen azken jokalaria ez izatea. Ivanovicek bi eskatu zizkion zuzendaritzari, kanpoko eta barneko lerrorako bana. Nocionik hegaleko beharra ondo baino hobeto beteko du. Orain saskipeko pieza falta da. Duela aste batzuk Will McDonald izan zitekeela zabaldu zen, beste taldekide ohi bat.