Andy Schleck-ek etapa, Contadorrek Tourra

Ezuste handi edota okerrik ezean, Alberto Contadorrek irabaziko du aurtengo Frantziako Tourra ere. Igandean izango da hori. Joan den urtean hura izan zen Tourreko garailea, 2007an ere bai. Hirugarrena eskuan du, eta 27 urte ditu oraindik.

Gaur zeukan Andy Schleck bigarren sailkatuak azkeneko aukera hari alde garrantzitsua kentzeko, Tourmaleten jo du erasoa helmugarako bederatzi kilometro falta zirela -aurretik faboritoen artean ez da deus gertatu Marie Blanque eta Soulor lehen mailako mendateetan-, baina Contadorrek ondo eutsi dio, arazorik gabe. Harrapatu dituzte ihes eginda zeudenak -Ruben Perez Euskaltelekoa, kasu, denbora askoan egon da ihesean-, eta biak bakarrik heldu dira Tourmalet gainera. 3,8 kilometroren faltan Contadorrek erasoa egin du, baina Schleckek erraz samar segitu dio.

Honek irabazi du etapa, Contador denbora berean sartu da -badirudi hitz egina zutela zeinek irabazi-, eta honek Tourra lortua duela esan daiteke. Sailkapen nagusian zortzi segundo kentzen dizkio Schlecki, larunbatean 52 kilometroko erlojupekoa izango dute, baina Contador hobea da nabarmen.

Gustura egoteko moduan da, baina, Schleck. 25 urte ditu, bigarren postua oso ona da eta aurten Tourrean bi etapa eskuratu ditu. Contadorrek oraindik ez du batere irabazi -2007ko itzulian bat lortu zuen, iaz bi-.

Joaquim Rodriguez sartu da gaur helmugan hirugarren, 1.17ra. Samuel Sanchez Euskaltel-Euskadiko txirrindularia bosgarren, 1.32ra, eta zortzi segundo kendu dizkio Denis Mentxovi laugarren sailkatuari.

Sanchezek hirugarren jarraitzen du sailkapen nagusian, 3.32ra orain. Laugarren Mentxov dago, 3.53ra. Podiumeko koska euren artean jokatuko dute. Bosgarren Jurgen Van den Broeck dago, 5.27ra. Seigarren Robert Gesink, 6.41era. Zazpigarren Rodriguez, 7.03ra.

Bihar, 18. etapa, laua: Salies de Bearn-Bordele, 198 kilometro. Igandean bukatuko da Frantziako itzulia.

Orain arteko etapak

- Aitzin-etapa: Rotterdam-Rotterdam. Irabazlea: Fabian Cancellara. Liderra: Fabian Cancellara.

- 1. etapa: Rotterdam-Brusela. Irabazlea: Alessandro Petacchi. Liderra: Fabian Cancellara.

- 2. etapa: Brusela-Spa. Irabazlea: Sylvain Chavanel. Liderra: Sylvain Chavanel.

- 3. etapa: Wanze-Porte du Hainaut. Irabazlea: Thor Hushovd. Liderra: Fabian Cancellara.

- 4. etapa: Cambrai-Reims. Irabazlea: Alessandro Petacchi. Liderra: Fabian Cancellara.

- 5. etapa: Epernay-Montargis. Irabazlea: Mark Cavendish. Liderra: Fabian Cancellara.

- 6. etapa: Montargis-Gueugnon. Irabazlea: Mark Cavendish. Liderra: Fabian Cancellara.

- 7. etapa: Tournus-Rousses. Irabazlea: Sylvaine Chavanel. Liderra: Sylvaine Chavanel.

- 8. etapa: Rousses-Morzine Avoriaz. Irabazlea: Andy Schleck. Liderra: Cadel Evans.

- 9. etapa: Morzine Avoriaz-S. Jean de Maurienne. Irabazlea: Sandy Casar. Liderra: Andy Schleck.

- 10. etapa: Chambery-Gap. Irabazlea: Sergio Paulinho. Liderra: Andy Schleck.

- 11. etapa: Sisteron-Bourg les Valence. Irabazlea: Mark Cavendish. Liderra: Andy Schleck.

- 12. etapa: Bourg de Peage-Mende. Irabazlea: Joaquim Rodriguez. Liderra: Andy Schleck.

- 13. etapa: Rodez-Revel. Irabazlea: Aleksandr Vinokurov. Liderra: Andy Schleck.

- 14. etapa: Revel-Ax 3 Domaines. Irabazlea: Christoph Riblon. Liderra: Andy Schleck.

- 15. etapa: Pamiers-Bagneres de Luchon. Irabazlea: Thomas Voeckler. Liderra: Alberto Contador.

- 16. etapa: Bagneres de Luchon-Paue. Irabazlea: Pierrick Fedrigo. Liderra: Alberto Contador.

- 17. etapa: Paue-Tourmalet. Irabazlea: Andy Schleck. Liderra: Alberto Contador.