Araudi aldaketak 2010rako

FIAk hurrengo urteari begira Kirol Araudia eta Araudi Teknikoa eguneratu ditu. Haiek irakurrita, aldaketa interesgarri batzuk nabari dira. Gehienak ez dira sorpresa handia, eta aldaketa teknikoen ondorio dira; beste batzuk talde gehiago sartu izanaren ondorio dira, horiek batik bat sailkatze frogari begira.

Labur ditzagun aldaketa batzuk eta besteak, interesgarrienak aipatuz:

ALDAKETA TEKNIKOAK

* Autoen pisu minimoa 620 kilotara igo da, KERSaren erabilera ez kaltetzeko (oharra: FOTA taldeek euren artean adostua dute hurrengo urtean KERSa ez erabiltzea).

* Pneumatiko berogailuak baimenduta daude. Berez ez da aldaketa, orain ere erabiltzen direlako, baina hasiera batean hurrengo urterako debekatzea aurrikusia zegoen.

* Boxetako geldialdietan ez da erregaia kargatuko; errepostaiak debekatu egingo dira, eta pneumatikoak bakarrik aldatu ahal izango dira geldialdietan.

KIROL ALDAKETAK

Datorren urtean 20 autoren ordez 26 izango direnez, sailkatze saioan aldaketak dira batez ere.

* Sailkatze saioa hirutan banatuko da orain bezala, baina Q1ean kanpora joango diren gidariak zortzi dira (aurten bost), beste zortzi bigarren Q2an, eta azkeneko Q3rako hamar geratuko dira, aurtengo modura.

* Sailkatze saioko Q3 saioan autoek ez dute lasterketako erregai karga eraman beharko, eta low fuel deituriko moduan korrituko dute; hau da, sailkatzeko behar duten erregai justuarekin.

* Puntuaketa sistemak aurtengo moduan jarraituko du, nahiz eta Ecclestonek proposaturiko sistema (dominen araberakoa, garaipen gehien dituena txapeldun izendatuz) 2010ra atzeratu zuten taldeen kexak zirela eta. Azkenean, aldaketarik ez.