Armstrong: "Datorren urtean parte hartzen badut, irabazteko izango da"

Datorren urtean Tourrean parte hartu edo ez erabakitzeko irizpide bakar bat erabiliko duela iragarri du Armstrongek: indartsu sentitzen bada proba handi horretan izango da; forma onik lortzen ez badu, aldiz, ez. "Une honetan ez nau obsesionatzen sei Tourren marka hori ezartzeak. Datorren urtean parte hartzko aurten baino forma hobea sentitu behar dut, eta, noski, parte hartzen badut, irabazteko izango da. Bigarren izateko ez naiz etorriko",adierazi zuen atzo Parisen garaile izan eta ordu batzuren buruan.

Armstrongekin bost dira Tourraren historian lasterketa hori bost aldiz irabaztea lortu duten txirrindulariak: Anquetil, Merckx, Hinault, Indurain eta Armstrong bera. Karrerista mitikoen talde horretan sartzea "ametsa betetzea" zela azpimarratu zuen estatubatuarrak. Txirrindulari handi guzti horien artean hurbilenekoa Miguel Indurain sentitzen duela erantsi zuen Armstrongek: "Diferentzia fisikoak alde batera utzita, antz handia dugun txirrindulariak baikara; taktika eta estrategia berean oinarritu dugu lasterketa: mendian eutsi, erlojupeko onak egin, eta dena oso planifikatuta eduki ezustekoak saihestearren".

Nolanahi ere, aurtengo Tourra gogorra egin zaiola onartu zuen estatubatuarrak: "Orain artek Tourrik zailena irabazi dut. Aldea txikia baino nahikoa izan da. Akatsak egin ditut, baina nire aurkariek ere bai. Argi dagoena da lehendabizikoa dela indartsuena eta hori ni naiz".