Arrastoa uzten ari da

Denboraldi honetako Txapeldunen Ligan lehen ustekabekoa iritsi da, Bate Borisov taldearen aldetik iritsi ere. Bielorrusiako taldeak 3-1 irabazi zion atzo Bayern Munichi F multzoko bigarren jardunaldian, eta garaipenari esker, lider sendoa da, sei punturekin, jokatu dituen bi partidak irabazi ondoren —lehen jardunaldian 1-3 hartu zuen mendean Lille—.

Handia ari da egiten Bate Borisov Txapeldunen Ligan ari den zortzigarren aldian, hirugarrena multzoen ligaxkan. Parte hartu zuen aurreko bietan ez zen gai izan partidarik irabazteko, baina aldi honetan arrastoa uzten ari da. Nola, gainera. Multzo berean, Valentziak 2-0 irabazi zion Lilleri, eta bigarrena da, hiru punturekin, Bayernekin berdinduta.

Faboritoen artean, huts egin zutenak Bartzelona, Chelsea eta Manchester United izan ziren. Kataluniarrek 0-2 irabazi zioten Benficari, eta ingelesek Nordsjaellandi eta Cluji, 0-4 eta 1-2, hurrenez hurren. Chelsea, Bartzelona eta Manchester United lider dira euren multzoetan. E multzoan, Xakhtar Donetskek Chelsearekin dago berdinduta lau punturekin. Ukrainarrek bana berdindu zuten Juventusen zelaian, eta zailtasunetan jarri Italiako taldea. Juventusek berdindu egin ditu bi partidak.

G multzoan, Bartzelonak sei puntu ditu, Celtic Glasgowk baino hiru gehiago. Eskoziarrek 2-3 irabazi zuten Spartak Moskuren zelaian. Unai Emeryk zuzentzen duen taldea 2-0 aurreratu zen, baina Celticek buelta eman zion partidari azken minutuetan. Errusiarrek eta Benficak puntu bat dute.

H multzoan ere Manchester Unitedek jokatu dituen bi partidak irabazi ditu. Cluj eta Sporting Braga berdinduta daude bigarren postuan, hiru punturekin. Portugaldarrek 0-2 hartu zuten mendean Galatasaray. Turkiarrek ez dute punturik lortu oraindik.

Gaur jokatuko dira bigarren jardunaldiko partidak A, B, C eta D multzoetan. Portok eta Paris Saint-Germainek Portugalen jokatuko duten partida da hasiera batean eguneko neurketarik interesgarriena. Biek irabazi egin zuten lehen jardunaldian, eta ezustekorik ezean, multzoko lehen bi sailkatuak ere izango dira.