Ezin hobeto ekin diote Binakako Txapelketari Artola-Imazek, gaur bigarren puntua eskuratu dutelako bigarren jardunaldian. Alde handiz irabazi diete Urrutikoetxea-Olaizola II.ari Sorian (Espainia): 22-13.
Bi zati izan ditu partidak. Lehen erdian, berdintasuna izan da nagusi, gero garaile izan direnek hobeto jokatu badute ere. Pilotari abiadura ematera atera dira, eta lortu ere lortu dute, markagailuan antzeman ez bada ere egoera hori. Aurkariak beteranoak dira, eta gutxirekin asko egiten ondo dakitenak. Horrela eutsi diete gazteei lehen erdi horretan, baina 12nakoa izan da azkeneko oreka. Hortik aurrera, urdinak nagusi.
10-1eko partziala egin dute Artola-Imazek bigarren erdian, eta di-da batean amaitu dituzte lanak. Aurrelariak lan bikaina egin du, tanto politak ere bai, eta Imazek ere partida biribila egin du. Galtzaileen artean, Urrutikoetxea ez da fin aritu, batez ere bigarren erdian, eta Olaizola II.a salduta ibili da.
Gaurko puntuarekin, Artolak eta Imazek sailkapeneko burua hartu dute, Jaka eta Zabalaterekin berdinduta. Olaizola II.a eta Urrutikoetxea garaipen bat eta galdutako partida batekin daude.
