Asfedebik oraindik ezin du jaialdirik antolatu Club Deportivon

Asfedebik Deportivon gaurko antolaturiko jaialdia bertan behera gelditu da. Ia bi aste dira goiko harmailen azpiko hormigoi zati bat beheko eserlekuen gainera jausi zela, eta konponketa lanak eginda badaude ere, Herrizaingo Saileko Joko eta Ikuskizun Zuzendaritzak ez du oraindik baimenik eman. Asfedebin gaurko espero zuten bulego eta baimen tramite guztiak amaitzea, baina badirudi afera uste baino gehiago luzatuko dela. Enpresak argibide gehiago emango ditu gaur.

Bestalde, atzo egin zituzten, Iruñean eta Zornotzan, asteburu honetako EPELen Binakako Txapelketako lehen bi partidetarako pilota aukeraketak, eta Gonzalez-Laskurainek eta Olaizola II.a-Mendizabalek oso pilota mota desberdinak aukeratu zituzten larunbaterako. Aspekoek, frontisetik asko irteten direnak; Asegarcekoek, aldiz, behetik gehiago dabiltzanak. Arratsaldean, berriz, Zornotzan, Titin-Pascualek eta Berasaluze VIII.a-Beginok antzeko ezaugarrikoak aukeratu zituzten, errematerako egokiak.