Jaialdiko lehen neurketan ez zen kolorerik egon, eta Lemunok aise hartu zuen mendean Cecilio, buruz buru. Beste bi partidak irabaztera derrigortuta zegoen Aspe, eta halaxe egin zuen. Titin III.a eta Barriola ondo kostata nagusitu ziren Berasaluze VIII.a eta Beginoren kontra. Alde handiaz galduz joan ondoren, partidari buelta ematea lortu zuten. Hirugarren norgehiagokan erabaki zen nora joango zen ardoa, eta Eibarko bidea hartu zuen. Retegi Bi lan asko eginda nagusitu zen Olaetxearen kontra, lau t'erdian.
BURUZ BURUKOA
| Cecilio | 6 | |
|---|---|---|
| Lemuno | 22 |
Profesionalen mailako partida baino gazte mailakoen artekoaren antz handiagoa izan zuen buruz buruko partidak. Alde handia egon zen bi pilotarien artean, eta Lemunok arazo handirik gabe lortu zuen garaipena. Bogotakoak dohain ugari ditu banaka aritzeko, eta, Cecilio airez ongi defenditu zen arren, ezin izan zuen piloteoan agindu. Emaitzak erakusten du haien arteko aldea. Nahierara jokatuz, Asegarceko aurrelariak mota guztietako tantoak egin zituen aurrean.
BINAKA
| Titin III.a-Barriola | 22 | |
|---|---|---|
| Berasaluze VIII.a-Begino | 20 |
Esku-eskura eduki zuen Asegarcek ardoaren desafioa, baina azken txanpan ihes egin zion. Jaialdiko partida nagusiak denetarik izan zuen, momentu onak eta ez hain onak. Neurketaren lehen zatia ez zen gogoratzeko modukoa izan, hamazazpi tanto jokatu eta soilik bi izan baitziren egindakoak. Bere txarrean, hobeto moldatu ziren urdinak. Bigarren zatian, baina, ederki aldatu ziren kontuak. 15-6 ziren aurretik Berasaluze VIII.a eta Begino, baina ez zuten jakin izan aldeari eusten. Barriola seguru jokatzen hasi zen, eta Titin III.ak bere gain hartu zuen erantzukizuna erasoan.
Aspaldi ez bezala, fresko eta inspiratuta jokatu zuen Triciokoak, eta, atzelariaren laguntza bikainarekin, ez zien aukerarik eman aurkariei. Guztira hamabi egin zituen errioxarrak, ia denak bigarren zatian, harmailetako zaleen zoramenerako. Datu horrek erakusten du Titin III.aren balentria. Barriolak ere lan ona egin zuen. Hasieran pattal antzean aritu zen, pilota asko galduz; baina kantxari neurria hartuz joan zen heinean, askoz hobeto moldatu zen. Bost hilabete geldirik egon ondoren, ezin zaio gehiago eskatu leitzarrari. Azken txanpan pilota oso zailak ipini zituen frontisean.
Berasaluze VIII.a eta Begino, bestalde, zuritik beltzera pasa ziren istant batean. Ongi jokatzen hasi, eta huts asko egin zituzten, eta desafioa lau t'erdiko partidaren emaitzaren baitan utzi zuten.
LAU T'ERDIKOA
| Retegi Bi | 22 | |
|---|---|---|
| Olaetxea | 20 |
Zalantzarik gabe, jaialdiko neurketarik onena jokatu zuten Retegi Bik eta Olaetxeak lau t'erdiaren barruan. Ezaugarri on guztiak izan zituen lehiak: gogortasuna, kalitatea, emozioa... Olaetxea aurretik joan zen partida guztian (12-18), baina amaieran ez zuen jakin izan errentari eusten. Bi pilotariok sasoi oso onean iritsiko dira ostegunean aurkeztuko den lau t'erdiko txapelketara.
Binakako finala, gaur
Olaizola II.a-Beroizek eta Irujo-Merino I.ak gaur jokatuko dute binakako finala (17:00, ETB1). Ez dago faborito garbirik, eta, enpresa bakoitzak udan hiruna torneo irabazi ondoren, gaur hautsiko da berdinketa.
