Serio eta oso oldarkor ekin dio Athleticek Sevillaren aurkako partidari, baina, Sanchez Pizjuanen gehienetan gertatzen zaion bezala, esku hutsik itzuliko da Bilbora. Lekue, Raul Garcia eta Williams hiruko lerroan eta Aduriz aurrean kokatuta, lehen minutuetan zuri-gorriek atzean sartu dute aurkaria. Hiru gol aukera argi izan dituzte Raul Garciak, San Josek eta Lekuek; azken horrek langara bidali du jaurtiketa. Baina erasoko lehen jokaldian 1-0ekoa lortu du Gameirok, eta hurrengo jokaldian min hartu du Raul Garciak. Erdilaria saiatu da jarraitzen, baina aldaketa eskatu behar izan du. Belauna okertu zaio nafarrari, eta ikusi egin beharko da lesioak zenbateko larritasuna daukan.
Bigarren zatian erosoago jokatu du Sevillak, eta epaileak opari ederra egin dio, gainera, 59. minutuan izan ez den penaltia adierazita. Laportek ukitu ere ez du egin Krychowiak, baina penaltia adierazi du Prieto Iglesiasek. Gameirok ez du hutsik egin. De Marcos eta Williamsen aukera bana salbu, 2-0ekoarekin nahi eta ezinean ibili dira zuri-gorriak. Porrotaz gain, bosgarren txartel horia ikusita Adurizek ezingo du jokatu hurrengo astean Bartzelonaren zelaian. Raul Garciari, berriz, datozen orduetan egingo dizkiote azterketa gehiago.
