Athleticek Caparros entrenatzailea aurkeztu du

Atzo gauean irabazi zituen Fernando Garcia Macuak Athleticeko hauteskundeak, eta gaur bertan aurkeztu du lehen taldearen entrenatzailea: Joaquin Caparros (Sevilla, Espainia, 1955). San Mamesen egin dute aurkezpena. Hiru denboraldirako fitxatu du.

Lehen taldeak "gogoa, konpromisoa eta ilusioa" izango dituela hitz eman du Caparrosek, eta Athletic berekin "nortasuna daukan ekipoa" izango dela. Lezamako harrobiak "hobea" izan behar duela uste du.

Denboraldi-aurrean lehen 20-25 egunetan egunero hiru entrenamendu egingo dituztela jakinarazi du. "Aurrena 7:30ean, bigarrena 11:30ean edo 12:00etan, eta hirugarrena 19:00etan".

Caparros orain arte Espainiako Lehen Mailan bi taldetan izan da entrenatzaile: Sevillan (bost denboralditan) eta Deportivon (azkeneko bietan). Teknikari gisa, Sevillaren izan ditu lorpenik handienak: 2004an eta 2005ean UEFAra sailkatu zuen.

Bihar, berriz, Aitor Ocio jokalaria aurkeztuko du Makuak, San Mamesen, eguerdian. Zentral postuan jokatzen du Ociok. Presidenteak adierazi du Iñaki Muñoz Osasunako erdilari ohia asteartean fitxatzea espero duela.

Makuaren gutuna

Makuak Athleticeko jarraitzaileei gutuna helarazi die gaur, klubaren webaren bitartez, eta "poztasuna" adierazi du "hauteskundeetan ikusi den parte-hartzeagatik". "Athleticen etorkizuna axola zaigu, asko gainera eta adierazgarria da oso gure kluba bizirik eta sustraiturik dagoela baieztatzea", dio presidente berriak.

Athletic "zuzendaritzaren gainetik" dagoela esan du Makuak, eta bere kudeaketa "gardentasunean eta bazkidearekiko hurbiltasunean" oinarrituko duela. Jose Maria Del Nido Sevillako presidenteak esan du Ocio gaur goizean joan dela euren klubera traspasoa sinatzera eta Athleticek hiru milioi euro ordaindu dituela.

Kluba kirol arloan "handiagoa" egin nahi du, "baita ekonomiko zein instituzionalki ere".

Argazkian, Caparros eta Makua, gaurko aurkezpenean. (Argazkia: Athletic)