Athleticek eta Bartzelonak esan dute Espainiako Kopako finala jokatzeko euren "lehen aukera" Santiago Bernabeu Madrilgo estadioa dela. Real Madrilen estadioa da hura, eta klub horrek esana du finala izango den garaian —maiatzaren 25ean izango da— lan batzuetan ariko dira Bernabeun.
Espainiako Futbol Federazioak ez du erabakirik hartu, eta Athleticek eta Bartzelonak hamar eguneko epea eman diote Real Madrilekin hitz egiteko eta erabakia hartzeko.
Josu Urrutia Athleticeko presidentea eta Toni Freixa Bartzelonako bozeramailea bi orduz izan dira batzartuta, Madrilen, federazioaren egoitzan. Urrutiak eta Freixak nabarmendu dute finaleko bi klubentzat toki neutrala dela Bernabeu eta honek 80.000 lagunentzako lekua izatea ere ona dela.
