Athleticek izan du zorterik onena Kopan, Alcorcon egokitu baitzaio

Atzo egin zuten, Madrilen, Espainiako Kopako final-hamaseirenetarako zozketa. Athletic da zorte onena izan duen euskal taldea, Osasunarekin, Realarekin, Real Unionekin eta Portugaletekin alderatuta, ez baitzaio Lehen Mailako aurkaririk egokitu. Zuri-gorriek Alcorcon izango dute kontrario, Bigarren Mailara igo berri den taldea. Joaneko partida urriaren 27an jokatuko dute, Santo Domingo estadioan, eta itzulikoa bi aste geroago, San Mamesen. Athleticeko ordezkariak pozik azaldu ziren atzo zozketak emandakoarekin, baina guztiak zuhur mintzatu ziren, eta gogoratu zuten Alcorconek aurreko denboraldian Real Madril kanporatu zuela final-hamaseirenetan.

Kopan lehian ari diren beste euskal taldeek, berriz, Lehen Mailako taldeak izango dituzte aurkari. Osasuna Deportivoren aurka ariko da. Kanporaketa gogorra espero da, bi taldeek antzeko maila baitute eta oso ondo ezagutzen baitute elkar. Miguel Angel Lotinak zuzentzen duen taldeak abantaila du, itzulikoa etxean jokatuko baitu eta ezustekorik ezean han erabakiko baita dena.

Realak Almeriaren aurka neurtuko ditu indarrak. Bi taldeok hilaren 13an jokatu zuten elkarren aurka, eta bina amaitu zen partida. Txuri-urdinek etxean jokatuko dute joanekoa.

Euskal ordezkarien artean bi talde apalenek ere Lehen Mailako kontrarioen aurka jokatuko dute. Hala ere, ez Real Unioni, ez Portugaleteri ez zaie sari potolorik egokitu; Bartzelona edo Real Madril, alegia. Hala, gipuzkoarrak Sevillaren aurka ariko dira, eta bizkaitarrak, Getaferen aurka.

Espainiako Kopa

FINAL-HAMASEIRENAK

Alcorcon-Athletic

Osasuna-Deportivo

Reala-Almeria

Real Union-Sevilla

Portugalete-Getafe

Murtzia-Real Madril

Logroñes-Valentzia

Ceuta-Bartzelona

Poli Ejido-Vila-real

U. Las Palmas-Atletico Madril

Valladolid-Espanyol

Betis-Zaragoza

Xerez-Levante

Kordoba-Racing

Hercules-Malaga

Mallorca-Sporting