Athleticek eta Realak San Mamesen jokatuko dute Primera Iberdrolako bigarren jardunaldiko partida. Datorren irailaren 12an (12:00) neurtuko dituzte indarrak, eta Athleticeko bazkideek soilik izango dute aukera bertatik bertara ikusteko, gaur egungo murrizketak direla medio.
Realaren lehen aldia izango da San Mamesen jokatzen; Athleticena, aldiz, ez. Duela bi denboraldi, birritan jokatu zuten bertan zuri-gorriek, eta erantzun bikaina izan zuten zaleen partetik. Espainiako Kopako final-laurdenetako Atletico Madrilen aurkako partidan 48.121 ikusle izan ziren; inoizko kopururik handiena nesken partida batean Europan. Eta, bi aste beranduago, San Mamesen jokatutako Athletic-Levante norgehiagokan 25.000 zale izan ziren. Kasu honetan, edukieraren %30 sartu ahalko dira (15.986).
Gainera, asteburu honetan abiatuko da emakumezkoen denboraldia. Alavesen igoerarekin, guztira lau talde euskaldun izango dira Primera Iberdrolan. Denei egokitu zaie igandean jokatzea: Eibar-Sevilla (11:00), Alaves-Betis (12:00), Reala-Valentzia (16:00) eta Madril CFF-Athletic (19:00).
