Aurreikuspenak bete ditu

Tony Martinen (HTC-Highroad) izena zebilen denen ahotan Paris-Nizako seigarren etapa jokatu bezperan. Denek jotzen zuten faboritotzat alemaniarra 27 kilometroko erlojupekoa irabazteko. Ez zen gutxiagorako, Algarveko Itzulian erakustaldia eman baitzuen erlojuaren aurka. Faboritoa aipatu eta faboritoa azaldu. Martinek aurreikuspenak bete zituen atzo, eta Portugalen egin bezala, bera izan zen azkarrena.

Nagusitasunez lortu zuen Martinek garaipena, ibilbideko eremu guztietan berak egin baitzuen denbora onena. Azkenean, erraz antzean nagusitu zen, hogei segundo atera baitzizkion bigarren sailkatuari, Bradley Wiggins ingelesari (Sky). Richie Porte australiarra (Saxo Bank) sailkatu zen hirugarren, 29 segundora, eta Andreas Kloeden alemaniarra (RadioShack) laugarren, 46 segundora. Hala, Martin jarri da lider, erlojupekoa jokatu aurretik zazpi segundoko desabantaila baitzuen Kloedenekiko. Orain 36 segundora du herrikidea sailkapenean, eta 39ra Wiggins. Askoz atzerago dago Samuel Sanchez (Euskaltel-Euskadi). Txirrindulari espainiarra eskas aritu zen atzo erlojuaren aurka, eta 1.43 galdu zuen Martinekiko.Gaur zazpigarren etapa jokatuko da, azken-aurrena, Brignoles eta Bioten artekoa, 215,5 kilometrokoa, eta mendate gogorrez betetakoa. Sailkapen nagusia irauli dezake.