Aurrera Saiaz 2 (64)
Zazpi Iturri 1 (51)
KADETEAK
Labaka-Elustondo 20
Nazabal-Artola 22
GAZTEAK
Urbieta-Zinkunegi 22
Galluralde-Jaka 14
NAGUSIAK
Renobales-Galarraga 22
Olaetxea-Leunda 15
Iragan ostiralean Alegiako pilotalekuan elkartu ziren pilotazaleek lehia estu eta gogorra ikusteko aukera izan zuten. Iazko txapeldunak ia lau orduko kanporaketa behar izan zuen Amezketako Zazpi Iturriren bidea eteteko. Kadeteen partida kanporaketako onena izan zen, eta argi ikusi zengogotik lan egin beharko zuela sailkatu nahi zuen taldeak. 67 minutuko partidak bi zati izan zituen. Aurrera Saiazeko bikoteak indartsu ekin zion, Labaka aurrelariak asmatu egin zuen errematean, eta tarte polita egin (16-8). Hortik, aurrera, baina, Artola Zazpi Iturriko atzelaria agintzen hasi zen, hainbat pilotakada ikusgarri joz. Apurka partida orekatu zuten Amezketakoek (16-14), hemeretzina berdindu aurretik. Artolak ez zuen behera egin, eta berak erabaki zituen azken tantoak.
Txapeldunak kinka larrian zeuden, baina jubeniletan berdindu zuten kanporaketa. Partida gogorra izan zen hura ere, 67 minutukoa, eta Zazpi Iturriko Galluralde eta Jakak ondo eutsi zieten hasieran Euskal Herriko txapeldunei (13-13). Hortik aurrera, Urbietak ondo baliatu zuen Jakaren txakalalditxoa jokoan sartzeko, eta Zinkunegiren segurtasunarekin, zortzi eta bateko partzialarekin itxi zuten partida. Nagusien partidan, azkenik, Aurrera Saiazeko bikotea zen faborito, eta, hasiera estuaren ondoren (7-6), Renobalesek eta Galarragak tartea ireki zuten (13-7). Atzelaria izan zen laukoteko onena, eta Bidegoiango bikoteak ondo eutsi zion tanto aldeari amaierara arte.
Aurrera 3 (66)
Markina 0 (33)
KADETEAK
Olano-Hernandorena 22
Albisu-Pujana 7
GAZTEAK
Jaunarena II.a-Jaunarena I.a 22
Arrieta-Ansotegi 12
NAGUSIAK
Esain-Iriarte 22
Azpiri-Kastillo 14
Igande goizeko kanporaketak ez zuen izan ostiralekoaren antzik, Leitzako Aurrerak, etxeko pilotalekuan, ez ziolako tarterik utzi emozioari. Markinak pilotari batzuk falta zituen, eta nabaritu zen. Leitzako seikoteak irudi sendoa eman du txapelketa osoan, eta hiru kanporaketa irabazita, aurrenekoz pasatu da finalerdietara.
Aurrerak hasieratik bideratu zuen kanporaketa, eta ordu erdi pasatxo nahikoa izan zuen lehen partida irabazteko. Bi atzelariek ondo jokatu zuten, eta aldea aurreko koadroetan egon zen. Olano leitzarren aurrelariak partida bikaina jokatu zuen, eta hamasei tanto egin. Lehen partidako aldea altxorra zen, eta etxekoek lasai ekin ahal izan zioten jubeniletakoari. Jon Jaunarena nabarmendu zen, eta, anaiaren laguntzaz -bederatzi tanto egin zituen-, hasieratik egin zuten aldea (11-4). Markinako Ansotegik lan txukuna egin zuen defentsan, baina ez zen aski izan, eta Arrieta aurrelariak, lagundu nahian, hainbat huts egin zituen. Leitzako jubenilek 22-11 irabazi zuten azkenean, eta Aurrerak 25 tantoko aldea pilatu zuen; ondorioz, nagusien partidan ez zen deus ere egon jokoan.
Kanporaketa erabakita egonagatik, nagusien partidak izan zuen interesik, Esain profesional ohiak ikuskizuna eman zuelako. Hura izan zen laukoteko onena, eta hamar tanto egin zituen guztira. Atzelarien arteko lehia orekatua izan zen, bakoitzak seina pilota galdu bazituen ere. Aldea, beraz, aurrean egon zen.
