Aurreko bi urteetan bezala, Samuel Sanchez Euskaltel-Euskadiko txirrindulariak irabazi du Arraten Euskal Herriko Itzulian. Joaquim Rodriguez eta Chris Hornerrekin ihes egin du Usartza lehen mailako mendatean gora, etapako azken mendian, eta hirurak bakarrik heldu dira helmugara; aise nagusitu da esprintean Sanchez. Lider jarri da, gainera.
Rodriguez sartu da bigarren, Horner hirugarren. Hamabi segundora tropeltxo bat heldu da; han ziren, besteak beste, Damiano Cunego eta Tony Martin.
Gasteiz-Arrate Itzuliko 3. etapa (164 kilometro) korritu dute. Bihar, 4. etapa: Eibar-Ibardin.
Gaurkoa Euskaltelen denboraldiko bigarren garaipena izan da. Biak Sanchezek eraman ditu.
Larunbatean amaituko da Euskal Herriko Itzulia, Oñatin, 18,9 kilometroko erlojupekoarekin.
