2008ko ekainaren 17a
00:00
Kezkatuta dago Lars Lagerback Suediako hautatzailea. Bere selekzioak partida erabakigarria jokatuko du bihar Errusiaren aurka, eta oraindik ez daki Zlatan Ibrahimovic taldeko jokalari onenak jokatu ahal izango duen. Ibrahimovicek min du belaunean, eta ez dago sasoiko.
Basileako estadioko zelai berria
Saint Jacob Park Basileako estadioak zelai berria izango du txapelketako azken hiru partidetan. Azken egunetan Suitzan egindako euriak zelaia hondatu du, eta Eurokoparen antolatzaileak etaUEFA ados jarri dira zelaia aldatzeko. Herbehereetatik ekarri dute zelaia, 26 kamioitan, eta atzo hasi ziren jartzen. Final-laurdenetako bi partida eta finalerdi bat jokatuko dira Saint Jacob Park estadioan. Argazkian, langileak Basileako estadioan zelai berria jartzen.
Kritika gogorrak Txekiari, Eurokopatik kanpo geratu ondoren
Txekiar Errepublikako komunikabideek gogor egin dute euren selekzioaren aurka, herenegun Turkiaren aurka 3-2 galdu eta final-laurdenetatik at geratu ondoren. Peter Cech atezainak jaso du kritika gehien, hark Turkiaren bigarren golean egindako hutsak aurkaria suspertu baitzuen.
Kroaziak Turkiari irabazi zion1996ko ekitaldian
Kroaziak eta Turkiak behin bakarrik jokatu dute elkarren aurka partida ofizial batean. 1996ko Ingalaterrako Eurokopako final-laurdenetan izan zen, eta kroaziarrak nagusitu ziren, Goran Vlaovicek sartutako gol bati esker (0-1). Bi selekziok elkarren aurka jokatuko dute ostiralean.
Laugarrenez jarraian ariko da Portugalfinal-laurdenetan
Portugalek badu eskarmentua Eurokopako final-laurdenak jokatzen, aurtengoarekin laugarren aldiz jarraian iritsi baita kanporaketa horretara. Hirutan finalerdietarako sailkatu zen gero, 2000, 2004 eta 2008an. 1996an, aldiz, Txekiar Errepublikak kanporatu egin zuen (1-0).
Espainia ordezko jokalariekin ariko da Greziaren aurka
Espainiak final-laurdenetarako sailkapena ziurtatuta dauka, baita bere multzoko lehena izatea ere. Horrela, Luis Aragones Espainiako hautatzaileak argi utzi zuen atzo atseden emango diela aurreko bi partidetan aritu diren jokalariei, eta aldaketa dezente egingo dituela lerro guztietan, atetik hasita.
