Eloy Velasco Espainiako Auzitegi Nazionaleko epaileak atzera bota du Catalunya Accio eta Esaiten aurka Espainiako talde ultraeskuindar batek aurkeztu duen kereila. Espainiako ereserkia entzutean txistu egitera deitzeagatik (bideoa) aurkeztu zuten kereila hori, baina Velascok argitu du ez direla oinarritzen gertatu den ezertan, baizik eta agian gerta daitekeen zerbaitetan; horregatik bota du atzera.
Gainera, Velascok esan du kereilan aipatzen diren delituak ikertzea —gorrotoa bultzatzea, Espainia iraintzea eta ordena publikoa nahastea— ez dela Auzitegi Nazionalaren eskumena. Pablo Ruz epaileak ere atzera bota du beste talde ultraeskuindar baten salaketa; Athleticeko eta Bartzelonako zaleek "sinbologia terrorista" erakuts zezaketela salatzen zuen beste talde horrek.
