Txapeldunen Ligako postuak esku-eskura izan ditu Eibarrek, baina puntu bakarrarekin konformatu beharko dute gipuzkoarrek. Partida zaila zuten Vila-Realen aurkakoa, sailkapeneko goiko postuetan baitago, talde sendoarekin.
Eibar, ordea, ez da kikildu, eta aurre hartu du markagailuan Madrigalen. Sergi Enrichek Borja Bastonen pase bat baliatu du 27. minutuan Eibarren gola egiteko, eta handiagoa izan zitekeen abantaila, Dani Garciak penalti bat huts egin izan ez balu.
Indartsu zelairatu da bigarren zatian Vila-Real, baina ongi eutsi dio Eibarrek; eutsi bai, baina ez du baliatu zenbait minutuz bat gehiagorekin jokatu izana. Izan ere, Bonerak min hartu du, Vila-Realek hiru aldaketak eginak zituenean. Geroago, ordea, Keko egotzi du epaileak bigarren txartel horia erakutsita. Azkenean, 85. minutuan egin du berdinketaren gola Jaume Costak.
Eibar seigarren postuan da orain, 20 punturekin.
