Azken segundoan kolpea hartu du Espainiak, Hungariaren aurka

Azken segundoan eta penaltiz. Modu horretan galdu zuen Espainiak Europako Txapelketan hurrengo faserako sailkatzeko aukera. Partida amaitzeko bi segundo eskas falta zirenean 24-23 aurretik ziren espainiarrak, C multzoko bigarren jardunaldiko partidan. Baina epaileak penaltia adierazi zuen, eta Marco Sczcsarrek ez zuen barkatu. 24-24. Sailkapenaren buruan jarraitzen du Espainiak, hiru punturekin, eta, seguruena, ez du arazo handirik izango hurrengo faserako sailkatzeko. Baina lanak amaitzeko aukera ederra galdu zuen. Multzo horretako beste partidan Frantziak 24-28 irabazi zion Errusiari, eta lehen jardunaldiko hutsa zuzendu zuen.

Eta Norvegiari ere antzeko zerbait gertatu zitzaiola esan daiteke. Esloveniaren aurka lehen partida irabazita (28-27), aukera ona zeukaten norvegiarrek mahai gainean kolpea emateko. Baina Islandia nagusi izan zen, 34-32. Bina punturekin berdinduta daude bi selekzio horiek D multzoan. Hori bai, Kroazia da multzo horretako selekziorik indartsuena, Serbiarekin batera, eurena delako lehen bi partidak irabazteko gai izan den selekzio bakarra. Esloveniari 29-31 irabazi zion atzo Kroaziak.

Beste lau partida jokatuko dira gaur: Polonia-Danimarka, Serbia-Eslovakia, Alemania-Suedia eta Txekia-Mazedonia.