Baionak 24-7 irabazi du, eta Miarritzek 31-18 galdu, Top14ko jardunaldian

Bi euskal taldeek zori desberdinak ezagutu zituzten atzoko Top 14ko jardunaldian. Miarritze galtzaile atera zen Parisen egindako bidaiatik (31-18), eta Baionak ez zuen barkatu etxean Bourgoinen aurka (24-7).

Miarritzek garesti ordaindu zuen selekzioekin dauden bere jokalarien eskasia. Paris Lapurdiko taldea baino gehiago izan zen, eta merezita irabazi zuen. Miarritzeri, partida kudeatzeko eskarmentu falta nabaritu zitzaion. Hala ere, partidaren puntu positiboetan defentsan erakutsitako indarra geldituko da .

Baionarrek, haien aldetik, sailkapenean operazio ona egin zuten Bourgoin azken sailkatuari irabazi ziotelako (24-7). Baionarrek postu bat irabazi dute, eta zazpigarren postuan sailkatuta daude, Heineken Kopako postuen ateetan.

Atzoko partida, hala ere, ez zen denboraldiko onena izan. Baionarrek partida onegia ez zuten jokatu, eta erasoko puntua lortzerik ez zuten izan, hiru entsegu sartu baitzituzten. Bourgoin oso egoera larrian dago sasoi honetan, eta hala ere Baiona jokoz kanpo ezartzeko gai izan zen behin baino gehiagotan.

Itxura zaleek nahi bezain ona ez izan arren, gisa horretako partidak irabazten jakitea garrantzitsua da, eta garaipena lortzearekin konforme egon beharko dira lapurtarrak.

Ingalaterraren erakustaldia

Bestalde, atzo jokatu ziren Sei Nazioen torneoko bigarren jardunaldiko bi partida. Arratsaldeko lehen partidan Ingalaterrak oso eroso irabazi zion Italiari (59-13). Ingelesek torneoa irabazteko hautagai serioak direla erakutsi zuten, eta Chris Ashton hegalekoa izan zen haien jokalari onena, hiru entsegu sartu baitzituen.

Lehen jardunaldiko galtzaileen arteko lehia Galesen alde itzuli zen, Galesek Eskoziari irabazi baitzion (6-24). Azkenik, gaur bururatuko da bigarren jardunaldia Irlandak Frantzia jasoko baitu Dublinen (16:00, France 2). Partida irabazten duena Ingalaterrarekin batera lehian izanen da Grand Slama lortzeko.