Baionak eta Miarritzek galdu egin dute, berriz ere, Top 14an, eta zuloan dira

Jardunaldi beltza bizi izan zuten atzo Baionak eta Miarritzek. Euskal Herriko bi taldeek oso itxura pobrea erakutsi zuten, eta galtzaile atera ziren Top 14ko zazpigarren jardunaldian. Baionak etxean ezin izan zuen deus egin Montpellierren aurka (17-26), aitzinean gehiago izan zelako aurkaria. Miarritze, berriz, ezinean jardun zen Brivera egindako bidaian, eta porrot handia jaso zuen (32-7).

Bi partidak txarrak izan ziren lapurtarrentzat, eta gabezia berdintsuak erakutsi zituzten baionarrek eta miarriztarrek. Aitzinean haien aurkarien agintepean egon ziren, eta uztartzean dezente sufritu zuten. Hala ere, kontuan hartu behar da Baionak etxean jokatzen zuela, eta alde horretatik emaitza ezin txarragoa izan zen Aturri eta Errobi bitartekoentzat.

Bi partidek kolore gutxi izan zuten. Baionak apur bat gehiago eutsi zion Montpellierri, agian. Lehen zatian agintzen hasi zen, eta lehen oren laurdenean fresko aritu zen. Hala ere, hiru puntu bakarrik sartu zituen, eta, pixkanaka, Montpellierreko aitzinekoek haien suntsitze lanari ekin zioten. Hortik aitzina, Baiona ezinean aritu zen. Bigarren zatian puntu bakar bat ere ez zuen sartu ahal izan, azken minutuetako entsegua kenduta. Alderantziz, Doumeyrouren entseguak partida erabakita utzi zuen Montpellierrentzat.

Lehen minututik ezinean

Miarritze lehen minututik aritu zen ezinean. Brivek ederki lan egin zuen aitzinean, eta uztartzeetan ez zuen kolorerik izan lehiak. Etxeko taldeak lasai eraiki zuen garaipena, lau entsegu sartuta. Miarritze puntuak jaso eta jaso ari zen. Ez zuen sekula oldartzeko indarrik atzeman. Azkenean, merezita galdu zuen errugbi erakustaldia jasota.

Honenbestez, Baiona eta Miarritze sailkapeneko azken postuetan daude. Miarritze azkenaurrekoa da, zazpi partidatan garaipen bakarra lortuta. Eta Baionak Miarritzek baino hiru puntu gehiago ditu, eta jaitsiera postuak oso hurbil ditu.