Baionak Top14an jarraitzearekin amets egiten jarrai dezake

Lyon. Balan (Katvidze, 56. min.), Testa, Roux; Sousa (Short, 65. min.), Basson; N´Zi, Clement (Bontinck, 56. min.), Leguizamon; Forest (Januarie, 71. min.), Lespinas; Grosso, Raffault, Thomas, Romanet; eta Suchier.

Baiona. Iginiz (Manukula, 75. min.), Roumieu, Tialata (Boyoud, 72. min.); Chisholm, Boutaty (Flavell, 70. min.), Bernad, Baget (Marmouyet, 22. min.), Haare; Philips (Gartzia, 69. min.), Potgieter (Boyet, 69. min.); O´Connor, Mazars, Gerber, Huget; eta Heymans.

Markagailua. 0-7; 7-7; 10-7; 13-7; 16-7; 19-7 (atsedenaldian) 19-10; 19-17; 19-20.

Epailea. Mathieu Raynal.

Garai ederrean etorri da Baionaren lehen garaipena, etxetik kanpo. Top14a bukatzeko hiru partida falta direla, Euskal Herritik kanpo ezin izan zuen irabazi Didier Faugeronen taldeak. Atzo, azkenean lortu zuen garaipen hori, Lyonen zelaian. Eta hainbat hobe horrela, galduz geroz Bigarren Mailara jaitsiko zelako zuzenean.

Baionarren garaipenak Lyon Bigarren Mailara bidaltzeko balio izan zuen, bide batez. Horrez gain, hurrengo sasoian ere Top14an jarraitzeko esperantzari euts diezaioke Baionak. Garaipen horrekin Brive harrapatu du sailkapenean, 42 punturekin. Perpinya eta Bordele hiru puntura ditu orain. Hala ere, jaitsiera postuetan jarraitzen du Lapurdiko hiriburuko taldeak, berdinketa kasuetan Brivek aitzina hartzen baitio, bi taldeen arteko puntu aldea bere alde duelako.

Hemendik aitzina, irabazten jarraitu beharko du Baionak, eta Brivek, Perpinyak edo Bordelek beste hutsegite bat izatea itxaro beharko du. Hurrengo sasoian Top14an jarraitzeak prezio eta presio hori izanen du. Sasoi honetan bigarren aldiz bi partida jarraian irabazi ditu Baionak, eta liga bukatzeko gelditzen diren biak irabazi beharko ditu orain.

Haizea kudeatu ezin

Atzoko partida Lyonen jo zuen haize gogorrak baldintzatu zuen. Partida biziki ontsa hasi zen baionarrentzat, lehen minutuan 100 metroko entsegua sartu baitzuten. Hugeten abiadurak eta Gerberren jokoaren zentzuak 0-7 ezarri zuen Baiona.

Oren laurden bat berantago Forrestek Heymans lo harrapatu zuen, eta Suchierrek entsegua sartu zuen. Lyonek haizea alde zuen, eta Baionaren zelaian ari zen. Baionak zangorik ez zuen erabili, eta baloia aitzinekoekin jokatu zuen. Ordularia jaten ari zen, baina bere zelaian jokatuz Lyonen defentsak faltak eginarazi zizkion. Horrela iritsi zen atsedenaldia, Lyonen aldeko 19-7arekin.

Bigarren zatian, lan handia gelditzen zitzaion Baionari. Haizea baliatu, beranta betetzeko. O'Connorrek entsegua sartu zuen, eta Baiona berriz partidan sartu zuen, Lyonengandik bi puntura hurbilduz: 19-17. Bazirudien lehen zatian gertatukoa errepikatuko zela. Baina aldi horretan Baionak zuen haizea alde, eta Lyonek zituen faltak egiten.

Hala ere, Lyonek 60. minutuan partida irabazteko gakoa izan zuen. Hamar minutuko defentsaren ondotik, Baionak arriskua urrundu zuen, punturik jaso gabe. Azken zigor kolpe batean Boyetek garaipena eman zion.