Barriolak zuntz haustura txikia du hankan, baina ez du finala atzeratuko

Abel Barriolak ez du binakako finala atzeratuko, oraingoz. Atzo erresonantzia magnetikoa egin zioten ezker hankako soleo giharrean, eta zuntz haustura oso txikia duen arren, medikuak finalerako jokatzeko moduan egongo dela esan zion. Dena den, Barriolak entrenamendu gogor bat egingo du astelehen edo asteartean, eta orduan hartuko du azken erabakia. Ez da espero azken orduko eragozpenik, baina atzerapena eskatuko balu, segur asko bi aste geroago jokatuko litzateke, Aste Santuaren ondoren.

Olaizola II.a eta Begino, berriz, finalera begira jarriak dira, eta atzo ordu eta erdiko saioa egin zuten Bizkaia pilotalekuan, Berasaluze VIII.a eta Apraizekin. Beste bi saio egingo dituzte finalaren aurretik. Gaur, Xala izango da Bilbon entrenatuko duena.