Bartzelona, sasoian ez egonda ere, asko da gaur egungo Caja Laboral Baskoniarentzat. ACB Ligan hogei partidatatik zortzi galdu egin ditu Bartzelonak, baina Kopako finalean sartu da, herenegun Real Madril ACBko liderra mendean hartuta eta gaur arratsaldean Gasteizen Caja Laborali 69-80 irabazita. Laugarrenez sailkatu da finalera.
Eguneko lehen finalerdia parekatua izan da. Gasteizko taldea hobetoxeago aritu da hasierako partean, baina Bartzelonak ondo eusten zion. 19-18 zeuden lehen laurdenaren amaieran, 39-35 bigarrengoaren bukaeran, 57-55 ondorengoan.
Laugarren laurdenean jo dute kolpea katalanek. 34. minutuan, kasu, 57-69 ziren. Han puskatu dute finalerdia. Hiru jokalari aipatzeko: Huertas basea (bederatzi asistentzia), Navarro eskolta (20 puntu) eta Rabaseda hegala (defentsa bikaina, eta zazpi puntu). Partidako fitxa.
Beste finalerdian Valentziak 83-72 irabazi dio Kanaria Handiari.
Bihar izango da finala, Gasteizko Buesa Arenan, 19:00etan. Iaz Real Madrilek irabazi zuen titulua.
