Bitci Baskoniak hirugarren aldiz jarraian irabazi du Miribillan. Gasteiztarrentzat ez da denboraldi erraza izaten ari, baina azken asteetako hobekuntza benetakoa dela erakutsi dute gaur Bilbon: ez diote aukerarik eman Surne Bilbo Basketi (62-90). Bi taldeak playoffetan sartzeko lehian dabiltza, eta zazpigarren postua sendotu du gaur Baskoniak; hamaikagarren da Bilbo Basket.
Hasieran, hori bai, hobeto hasi dira etxekoak. (7-2, 10-3), baina Baskoniak markagailua irauli eta aurretik amaitu du lehen laurdena (19-20). Bigarren laurdena izan da erabakiorra: blokeatu egin da Bilbo, eta bikain baliatu dute aukera bisitariek. Atsedenaldira, 30-51. Bigarren zatian errenta handitu besterik ez du egin Baskoniak, eta aise eskuratu du garaipena.
Baskoniako onenak Fontecchio (19 puntu) eta Costello (18) izan dira, eta Bilbo Basketekoa, berriz, Goudelock (21).
