Basurko Getxotik 700 miliara dago

Bernard Stammek eta Kojiro Shiraishik atzo bukatu zuten Getxon (Bizkaia) Velux 5 Ozeano proba, lehen eta bigarren postuan hurrenez hurren, baina Unai Basurko bizkaitarrari oraindik falta zaio pixka bat, helmugatik 700 miliara dagoelako.



Hirugarren eta azken etapan Robin Knox-Johnston dauka aurretik, hirugarren tokian, 300 bat miliara. Basurkok, hala ere, sailkapen nagusiko hirugarren lekuari eutsiko diola uste du, Galiziatik Bizkaia alderako itsasertza "ezagutu" egiten duelako. Galiziara iristeko 500 milia falta zaizkio. "Ezagutza hori izan daiteke niretzat aldeetako bat". Lasai hartu nahi ditu gauzak, dena den. "Izan ere, ezin naiz despistatu. Milia bakoitzeko, gure itsasoaren koloreak antzematen ditut, nire lurraren usaina hartzen dut, baina egoera kontrolatu beharra daukat".