Bederatzigarren titulua irabaz dezake Rossik

Valentino Rossi (Yamaha) motoziklismoaren historian sartuta dago lehendik ere. Historiako onena dela ez dago zalantzarik, baina hark gehiago nahi du. Zortzi aldiz izan da munduko txapeldun -behin 125 cc-koan, 250 cc-koan eta 500 cc-koan, eta bost aldiz Moto GPn-, eta bederatzigarren titulua irabaz dauka. Bihar bertan irabaz dezake. Malaysiako Sari Nagusia jokatuko dute goizaldean (08:00etan), azken-aurreko proba, eta aski du laugarren sailkatzea txapeldun izateko. Atzoko entrenamendu saioetan laugarren izan zen, Jorge Lorenzo (Yamaha), Casey Stoner (Ducati) eta Dani Pedrosaren (Honda) atzetik.

Erabakitzeke dago 250 cc-ko txapelketa. Maila nagusian baino lehia estuagoa daukate Hiroshi Aoyamak(Honda) eta Marco Simoncellik (Aprilia). Hamabi puntu aurretik da japoniarra. Atzoko saioan Aoyama izan zen onena. Simoncelli hamargarren sailkatu zen. 06:15ean da lasterketa. 125 cc-koa, berriz, 05:00etan.