Bera Berak Espainiako Kopa seigarrenez irabazi nahi zuen, kuttuna duen lehiaketan —laugarren urtez jarraian heldu dira finalera—. Ez dute Mavi talde asturiarra mendean hartzea lortu, ordea. Aurkaria hobea izan da, eta 20-17 nagusitu zaio talde donostiarrari.
Partida parekatuta hasi da, eta 8-7ko emaitzarekin amaitu da lehen zatia. Bigarrenean, ordea, Bera Bera ez da fin ibili erasoan, eta ez du Maviren defentsa apurtzea lortu. Asturiarrek aldea handitu dute (15-10, 44. minutuan). Sei goleko alde ere izan dute (17-11).
Azken minutuetan, aldea zerbait murriztu du Bera Berak, baina ez da neurketa berdintzeko nahikoa izan. Azkenean, 20-17 amaitu da norgehiagoka, eta talde donostiarra zilarrezko dominarekin itzuliko da etxera.
Datorren urtean, Barakaldok (Bizkaia) hartuko du emakumezkoen Espainiako Kopako finala.
