Bera Berak irabazi du Espainiako Superkopa, historian bigarrenez

Ezin hobeto ekin dio denboraldiari Bera Berak, atzo bertan Espainiako Superkoparen jabe egin baitzen Bidebietan, Itxakori 42-18 irabazita. Astindua eman zion talde gipuzkoarrak nafarrari, aurrez espero zen gisan. Jokalari onak dauzka Reyes Karrerek bere aginduetara; ez, ordea, Eduardo Izquierdok, eta hori begi bistan geratu zen. Pronostikoak betez, Berak Berak altxatu zuen kopa, historian bigarrenez.

Lehenengo jokalditik igarri zen zer-nolako aldea dagoen bi taldeen artean. Bera Berak nahi erara mugitu zuen baloia ezker-eskuin, eta Itxakok ez zion usainik hartu ere egin. Noski, jokaldia gola sartuta amaitu zen. Bada, halaxe joan zen neurketa osoa. Berehala hartu zuten aurrea garaileek, eta aldea handituz joan zen gerora.

8-3, 10-4 eta 16-8 ibili zen aurretik Bera Bera. Atsedenaldira 18-9ko emaitzarekin iritsi ziren. Entrenatzaileek ez zuten esateko ezer handirik edukiko aldagelan, bakoitzak zekiena ongi egin baitzuen. Itxako pare bat entrenamendu eginda iritsi zen neurketara, eta ezin zitzaion gehiago eskatu. Arazo ekonomikoak tarteko, aurten beste helburu batzuei egingo beharko die aurre, eta sufritzen ere ikasi beharko du. Atzo izan zuen aurtengo sasoiaren lehenengo isla.

Dena den, bigarren zatiari gogotsu ekin zieten nafarrek. Lehenengoan adina gol sartu zituzten: bederatzi. Bera Berak, berriz, bere ildotik jarraitu zuen, golak bata bestearen atzetik sartzen. Karrerek jokalari guztiei eman zien jokatzeko aukera, baita Nagore Arizagari ere, eta andoaindarrak gol bat sartu zuen. Azkeneko emaitza 42-18koa izan zen.

Partidako golegile nagusia Menendez Bera Berakoa izan zen, zortzi sartuta. Castrok ere sei sartu zituen. Itxakori dagokionez, guztiak aritu ziren berdintsu, eta lana gogotik egin beharko dute aurten mailari eusteko.