Berasaluze II.ak eta Albisuk binakako txapelketako ligaxkako lehen puntua lortu dute, Olaizola II.ari eta Zabalari 22-14 irabazita. Albisuk txapelketako partidarik onena jokatu du Iruñean, eta Berasaluzek bikain baliatu du guztira 18 tanto egiteko —bost saketik—. Hala ere, gogor eta orekatua izan da, Olaizolak eta Zabalak ondo eutsi dietelako, eta irabazleen hutsak eragin dituzte. Berasaluzek eta Albisuk luze jokatu dute, Olaizola saihestuz, eta Zabalak 14nako berdinketara arte eutsi dio tratuari. Irabazleek jarraian egin dituzte azken zortzi tantoak.
Emaitza honekin Olaizola II.ak eta Zabalak ia ezinezko dute finalean sartzea, jokaturiko bi partidak alde handiz galdu dituztelako (22-8 eta 22-14). Jardunaldia bihar bukatuko da, Irujo-Zabaletak eta Bengoetxea VI.a-Beroizek Bilbon jokatuko duten partidarekin.
