Berdinketa, eta eskerrak

Txapeldunen Ligako lehen hiru saioek agerian utzi dute talde indartsuenak adi-adi egon ezean, muturrekoren bat jaso dezaketela. Lehen jardunaldian Trabzonspor izan zen ezustekoa eman zuena Inter Milanen zelaian 0-1 irabazita. Bigarren jardunaldiko lehen egunean, berriz, Basileak eman du ustekabekoa, Old Trafforden, Manchester Unitedekin berdinduta (3-3). Suitzako taldeak egindakoak, gainera, meritu handia du, etxeko taldea 2-0 aurreratu ostean, emaitzari buelta emateko gai izan baitzen. Luzapenean, baina, Manchester Unitedek berdinketaren gola sartu zuen. Basilea, hala ere, lider da C multzoan, Benficarekin berdinduta. Portugaldarrek 0-1 irabazi zuten atzo Otelul Galatiren zelaian. Hirugarren da Manchester United, bi punturekin, eta garaipenik lortu ezinik.

Manchester United izan zen indartsuenen artean huts egin zuen bakarra. A multzoan, Bayern Munichek bigarren neurketa irabazi zuen, etxean, Manchester Cityren aurka (2-0). Multzo berean, Napoli 2-0 nagusitu zitzaion Vila-reali. Sailkapenean, Alemaniako taldeak sei puntu ditu, eta Napolik lau. Atzerago daude Manchester City (puntu bat) eta Vila-real (punturik gabe). Lau jardunaldi falta dira jokatzeko, baina zaila dirudi Bayern Munichek lehen postua ez lortzea. Bigarren posturako lehia, berriz, irekiago egongo da.

B multzoan, berriz, Inter Milanek atzean utzi zuen lehen jardunaldian etxean Trabzonsporren aurka galduta jasotako muturrekoa, eta 2-3 hartu zuen mendean CSKA Mosku. Beste partidan, Trabzonsporrek eta Lillek bana berdindu zuten Istanbulen. Hain zuzen ere, Turkiako taldea da lider multzo horretan, italiarrek baino puntu bat gehiagorekin.

D multzoan, berriz, argiago dirudi nor izango den multzoko lehena, Real Madrilek bigarren partida irabazi baitzuen: 3-0 Ajaxen aurka. Bigarren postua Olympique Lyonentzat behar luke, lau puntu baitituzte frantziarrek, Dinamo Zagrebi 2-0 irabazi ondoren.

Gaur beste zortzi partida jokatuko dira. Valentziaren eta Chelsearen artekoa da aipagarriena.