Bergara: «Derbiak gorriz markatuta edukitzen ditugu»

Partida gogoangarria izango da beste behin ere Athleticek eta Realak etzi San Mamesen jokatuko dutena (16:00). Markel Bergara Realeko jokalariaren arabera, «aste berezia» izaten da jokalari guztientzat. Zer esanik ez zaleentzat. Irrikaz daude bateko eta besteko jarraitzaileak. «Horrelako partidak gorriz markatuta edukitzen ditugu denok egutegian».

Athletic aspaldiko boladarik onenean da, eta, horregatik, partida zaila izango da txuri-urdinentzat. Bergararen esanetan, «oso joko ona ari da egiten Bielsaren taldea. Maila handia erakutsi dute aurrealdean eta atzealdean. Partida zaila izango da, inongo ezbairik gabe, baina asmo onekin goaz. Geurea ondo egiten badugu, irabazteko aukera izango dugu».

Badute horrela pentsatzeko arrazoirik. Joan den igandean Mallorcari irabazita, «konfiantzaz beteta» daude donostiarrak. Xabi Prieto erdilaria ere sinetsita dago taldeak «gerra» emango duela Katedralean. Donostiarra Bergararen iritzi berekoa da. «Kalitate eta indar handiko taldea da Athletic. Ezin hobeto uztartzen dituzte ezaugarri horiek». Biek dakite San Mamesen puntuak lortzea beti dela zaila. Bergararen arabera, «oso partida ona jokatu beharko dugu irabazi nahi badugu. Horrelako partida bat irabaztea beti da zaila. Haientzat ere handia izango da guri irabaztea. Beti izan gara haien aurkaririk gogorrena. Zelaira bete-betean irtengo direla pentsatzen dut. Gogo handia dugu San Mamesen emaitza on bat lortzeko».

Lau punturen aldea baino ez dago bi taldeen artean. Prietorentzat, ez dago ezinezkorik. «Mallorcaren aurka garaipen garrantzitsua lortu eta gero, ez diogu sailkapenean gora begiratzeari uko egiten».

Cadamuro, min hartuta

Liassine Cadamurok min hartu zuen herenegun, Aljeriako selekzioarekin Gambiaren aurka jokatu zuen lagunarteko partidan. Zaintiratua du. Gaur edo bihar jakingo da Athleticen aurka jokatzeko moduan egongo den ala ez. Lehen aldiz aritu da CadamuroAljeriako selekzioarekin.