Juan Martinez de Irujo gastroenteritisa jota dagoela-eta, bihar Iruñeko Labrit pilotalekuan jokatzeko zen partida egunez aldatzea erabaki dute enpresek, eta asteartean jokatuko da, Tolosako Beotibar pilotalekuan. Binakako txapelketako sailkapen faseko zortzigarren jardunaldiko partidan ikusiko dute elkar Irujo-Merino II.ak eta Berasaluze VIII.a-Apraizek. Aspeko bikoteak garaipena behar du sailkapena bideratzeko. Bizkaitarrek, berriz, irabazita ere oso etorkizun iluna dute.
Bitxikeria da aldez aurretik ere partida hori egunez aldatu zela. Hasiera batean Tolosan jokatzekoa zen, astelehenean, Inauteriekin batera. Baina, Abel Barriolak min hartu zuenean, larunbatera pasatzea erabaki zuten, telebistan ikusteko erakargarriagoa zelakoan. Azkenean, Tolosara itzuliko da partida, egun bat beranduago jokatuko den arren.
