Beste planeta batean

Miarritze. Barcella (Blaauw, 72. min), Genevois (Hegi, 48. min), Kodela (Synaeghel, 54. min); E. Lund, Dubarry; Lauret, Lakafia, Guyot; Lesgourgues, Berquist; Brew, Traille (kap.), Gimenez, Ngwenya; eta Balshaw.

Toulon. Sheridan, Bruno, Hayman; Botha, Suta; Van Niekerk (kap.), Masoe, S. Armitage; Tillous-Borde, Wilkinson; Smith, Giteau, Mermoz, Martin; eta D. Armitage.

Markagailua. 3-0, 3-3, 6-3, 6-10, 6-13, 9-13, 9-16 (atsedenaldian); 9-19, 9-22, 9-29 eta 9-36.

Epailea. Peter Fitzgibbon.

Batzuetan aitzakiek ez dute balio. Norbera baino talde hobearen aurka galduta ezin da lotsatu; ezin denean, ezin da. Eta Toulonek beste planeta batean dagoela erakutsi zuen atzo, Miarritzeri erakustaldia emanda irabaziz. Mediterraneokoek erasoko puntu gehigarria lortu zuten, eta sasoi honetan dena irabazteko hautagaiak direla erakutsi zuten.

Miarritzek ahal zuena egin zuen, eta hasieran Toulon estu hartu arren, minutuak pasa ahala nabarmena izan zen kanpokoen klasea. Sasoi hastapenean ez bezala, zangoz ez zuen beharbesteko zehaztasunik erakutsi. Mat Berquistek lehen partida izan zuen atzo, eta ostikoetan zer hobetua baduela erakutsi zuen. Miarritzek aitzina hartu zuen markagailuan, 6-3, baina Toulonek sekulako entsegua sartu zuen 22. minutuan, Stefon Armitagerekin. Min egin zuen. Toulon aitzinetik joan zen aldageletara (9-16).

Eta bigarren zatian agintzen jarraitu zuen. Etxekoak bizkor hasi ziren, baina Toulonek ederki erantzun zuen defentsarekin. Jonny Wilkinsonek zangoz zuloa egin zuen (9-22). Miarritzeri esperantza berpiztu zitzaion 70. minutuan, Simon Shawen txartel horiarekin. Toulonek, baina, indar erakustaldia eman zuen. Bi entsegu sartu zituen jarraian, jokalari bat gutxiagorekin; Vincent Martin gazteak sartu zuen lehenengoa, eta Mat Giteauk bigarrena, kontraerasoan: 9-36.

Sasoi hastapen bikaina egin ondoren, lau partida galdu ditu Miarritzek jarraian. Esnatu beharra dauka hurrengo partidetan.