Bigarren mailaren amildegia gero eta gertuago dute gorritxoek, puntu bakarra eskuratu baitute Bartzelonan, Espanyolen kontrako partidan. Okerrago izan zitekeen, galtzen hasi baita Iruñeko taldea. Colottok egin du etxekoentzako gola 21. minutuan, korner batean.
Emaitza horrekin, bigarren mailara matematikoki jaistekotan zen Osasuna. Lehen zatiaren hondarrean, ordea, berdinketaren gola egin zuen Acuñak, Patxi Puñalek jaurtitako falta bat sareratuz. Bigarren zatian, bi taldeek puntua eustea lehenetsi dute, eta aukera garbirik sortu gabe igaro dituzte bigarren 45 minutuak.
Gauzak horrela, Osasunak Betisi irabazi behar dio datorren astean ezinbestean, eta hori ere baliteke nahikoa ez izatea lehen mailari eusteko. Aukera argiena da Valladolidek Granadari irabaztea azken jardunaldian. Etxean hartuko du Osasunak Betis, azken sailkatua, igandean 18:00etan.
Sailkapena:
15. Almeria 39
16. Getafe 39
17. Granada 38
18. Osasuna 36
19. Valladolid 36
20. Betis 25
