Bi pilota aukeraketa egingo dituzte gaur, Urdulizen eta Iruñean

Berasaluze VIII.a eta Apraiz batetik, eta Gonzalez eta Laskurain bestetik. Bi bikote horiek gaur arratsaldean (16:00) aukeratuko dituzte ostiral iluntzerako pilotak, Urdulizen (Bizkaia). Oso jardunaldi garrantzitsua da bi bikoteentzat, Berasaluze VIII.ak eta Apraizek urrats garrantzitsua egingo luketelako laugarren partida irabazita. Gonzalez eta Laskurain, berriz, bi garaipenekin daude sailkapenean, eta galduz gero, oso atzean geratuko lirateke.

Urdulizkoa garrantzitsua, eta Iruñekoa ere antzekoa. Izan ere, Xalak eta Barriolak esku-eskura edukiko lukete finalerdietara sailkatzeko aukera, Bengoetxea VI.ari eta Ruizi irabazita. Bost garaipenekin daude lehen biak, eta seirekin ia ziur barruan leudeke. Asegarceko bikotearentzat, hala ere, oso garrantzitsua da larunbateko puntua, hiru garaipenekin daudelako sailkapenean. 11:30ean hasiko dira pilotak aukeratzen, Labrit pilotalekuan, Iruñean.