Eguraldia lagun, Aberdeeneko zaleek kolore gorriz jantzirik daukate Donostia. Euren taldeak Realaren aurka Europako Ligako atarikoa jokatuko duela eta, 400 bat lagun etorri dira Eskoziatik, eta zaratatsu agertu dira, eguerditik aurrera batez ere. Zale batzuk atzo etorri ziren, baina gehienak gaur bertan. Denak elkarturik, Bulebarreko terrazetan eseri, eta kantuan eta festan dabiltza etengabe. Garagardorik ere ez dute falta. Jarraitzaile izugarri bildu ez arren, euren berri ongi eman dute Aberdeeneko zaleek.
Eskoziarrek sintonia ona erakutsi dute gainera hasiera-hasieratik zale txuri-urdinekin. Bi taldeetako jarraitzaileek argazki ugari egin dituzte elkarrekin, eta txisteak ere ez dira falta izan. Partidari begira, baikor agertu dira kanpotarrak, eta kanporaketa igarotzeko gai ikusten dute euren taldea.
