Bielsa: «Larri irabazi dugu, baina merezita; oso pozik gaude»

Pozik zegoen Marcelo Bielsa partidaren amaieran. Pozik, baina bere estiloari leial, zuhur, euforiari tarterik utzi gabe. «Larri irabazi dugu, baina merezita; oso pozik gaude». Athleticeko entrenatzaileak esan zuen euren jokoa egiteko «aukera» izan zuten arren, «zailtasunak» izan zituztela hori aurrera eramateko. «Kostatu egin zaigu jokaldi landuak egitea. Motel aritu gara, ideiarik gabe». Iker Muniainen gola «unerik onenean» iritsi zela aitortu zuen, epaileak Amorebieta kanporatu eta gutxira. «Golak berdindu egin zuen jokalari bat gutxiagorekin geratu izana». Manchester Uniteden aurkako kanporaketaz, berriz, azpimarratu zuen ez dela beste kanporaketa bat gehiago. Muniain ere «oso pozik» azaldu zen, eta argi utzi zuen «irabaztera» joango direla Manchesterrera.