Bigarren itzuliko lehen garaipena nahi du Arratek, baina erronka zaila du Granollersen

Arratek ez du nahi bezala hasi Asobal ligako bigarren itzulia. Aukera ona zuen garaipen batekin hasteko, baina Naturhousek puntu bat eraman zuen Ipuruatik. Eibartarrak, halere, ez daude kexatzeko moduan, esku-hutsik geratzekotan egon baitziren. Lehen aukeran huts egin ondoren, gaur dute bigarrena. Ez dute, ordea, erronka samurra, Granollersen kantxan jokatuko baitute (20:45).Kataluniako taldeak ederki hasi zuen sasoia. Lider izan zen, baina lehiaketak aurrera egin ahala, behera egin du, eta espero zen postuetan da orain: seigarren. Hori bai, ondo jokatzen jarraitzen du. Azken jardunaldian Almeriari emandako astindua da horren adibide: 24-37 irabazi zuen.

Aurkariaren sasoi ona gutxi balitz bezala, Arratek beste arazo bati egin beharko dio aurre, joko antolatzailerik gabe ariko baita, Dalibor Cutura erdikoa min hartuta baitago. Beraz, Arrietak eta Ivo Diazek txandaka ibili beharko dute erdiko postuan. Arratek egun gogorrak ditu aurretik, larunbatean Aarhus Danimarkako taldea hartuko baitu EHF Kopako final-zortzirenetako joanekoan.

Itxako, Sagunten

ABF ligan, berriz, Itxakok partida zaila du, Astroc Sagunten pistan jokatuko baitu (19:00). Lizarrako taldea sendo dago lehen postuan, jokatutako hamalau partidak irabazita. Sei puntu ateratzen dizkio Eldari, eta zazpi puntu Sagunti, gaur aurkari izango duen taldeari hain zuzen ere.

Herrialde Katalanetako taldeak oso jokalari onak ditu, eta ustekabean harrapa dezake edozein aurkari. Ambros Martinek zuzendutako jokalariek badakite zer egiteko gai den Sagunt, lehen itzulian estu eta larri irabazi baitzioten (25-24). Garaipena lortuz gero, txapela irabazteko beste aurrerapauso bat emango luke Itxakok, liga amaitu arte geratzen zaizkion norgehiagoka zailenetako bat baita gaurkoa. Sagunten jokatu ondoren, Danimarkara abiatuko dira Itxakoko kideak, larunbatean EHF Kopako final-zortzirenetako itzulikoa jokatuko baitute Slagelseren aurka.