Europako postuetara are gehiago gerturatzeko aukera ona galdu du Eibarrek, gaur, Vigon (Galizia) galduta. Garesti ordaindu du lehen zatian, nagusi izan denean, golik ez sartzea. Izan ere, bigarren zatian goitik behera egin dute bisitariek, eta behetik gora etxekoek. Hala, 56. minutuan Iago Aspasek norgehiagokako lehen gola sartu du. Gol horrek min handia egin dio Eibarri, eta hortik amaierara ezinean aritu dira. Etxekoek bikain aprobetxatu dute bisitarien txakalaldia bigarren gola sartu eta neurketa erabakita uzteko. Maxi Gomezek sartu du gol hori, 79. minutuan.
Gaur galduta, Celtak aurrea hartu dio Eibarri sailkapenean. Zazpigarren da orain Galiziako taldea, 35 punturekin, seigarren postutik hiru puntura. Puntu kopuru bera du Eibarrek, baina postu bat egin du atzera, eta zortzigarren da orain, atzetik datozenen emaitzen zain. Eibartarrek goiko postuetan sendotzeko partida oso garrantzitsua jokatuko dute datorren asteazkenean, Vila-real seigarren sailkatua hartuko baitute Ipuruan, 21:30ean.
