Binakako txapelketan lehiatuko diren bikoteen zerrenda jakinarazi dute gaur enpresa antolatzaileek. Iazko txapelketarekin alderatuta, lau pilotari berri izango dira lehian: Ladis Galarza, Julen Martija, Ander Imaz eta Victor Esteban.
Txapeldunordeak ez bezala, iazko txapeldunak ez dira elkarrekin ariko, baina txapelketan esperientzia duten pilotariekin ariko dira. Iker Irribarriak David Merinorekin osatuko du bikotea, eta Beñat Rezustak, berriz, Danel Elezkano izango du aurrelari.
Iazko binakako txapelketan ez bezala, Mikel Urrutikoetxea aurrelari gisa arituko da. Ladis Galarza izango du lagun lau eta erdiko txapeldunordeak. Distantzia laburreko txapeldun Jokin Altuna lau eta erdiko txapeldunak, berriz, Martija izango du atzetik.
Hau da txapelketan lehiatuko diren bikoteen zerrenda osoa:
Urrutikotxea - Ladis Galarza
Altuna III - Martija
Irribarria - Merino II
Bengoetxea VI - Larunbe
Olaizola II - Imaz
Elezkano II - Rezusta
Victor - Albisu
Ezkurdia - Zabaleta
Lehen jardunaldia
Ostiralean hasiko da binakakoa, Beran (Nafarroa). Olaizola II.ak eta Imazek aurkari izango dituzte Ezkurdia eta Zabaleta. Larunbatean, lau eta erdiko bi finalistak arituko dira nor baino nor, Iruñeko Labriten. Igandean, Logroñon jokatuko dute Victorrek eta Albisuk, Bengoetxea eta Larunberen aurka. Astelehenean, berriz, Irribarriak eta Merino II.ak neurtuko dituzte indarrak, Elezkano II.aren eta Rezustaren kontra.
